மனதில் ஒரு ஜல்லிகட்டு

ஜல்லிக்கட்டு தடையை நீக்க கோரி கடந்த வாரம் நடந்த போராட்டம். அதனை ஒட்டி வந்த சில "whatsapp" செய்திகள், "facebook" பதிவுகள். அதன் பின்னர் நடைபெற்ற சில சம்பவங்கள். இவைகளின் திரட்டுகள், சிந்தனைக்கு..பிழை இருந்தால் மன்னிக்கவும்.

1) சதிகளும் சூழ்ச்சிகளும் கதைகளில் படிக்க , படங்களில் பார்க்க நன்றாக இருக்கும். நடைமுறை வாழ்க்கை அவ்வாறாக இருந்தால் என்னாவது? தமிழ் மக்களின் மொத்த எண்ணிக்கை சுமார் 50 மில்லியன் என எடுத்து கொள்வோம். மொத்த உலகத்தின் தற்போதைய மக்கள் தொகை 6 பில்லியன். உலகத்தில் உள்ள அனைவருக்கும் தமிழர்களின் பாரம்பரியத்தை குலைப்பதே வேலையாக இருக்க முடியுமா? PETA வின் நடவடிக்கையானது ஜல்லிக்கட்டு விஷயத்தில் பாதகமாக இருக்கலாம். அதற்காக  அந்நிறுவனத்தையும், அந்நிறுவனத்தின் ஆதரவாளர்களையும் முக்கியமாக அந்நிறுவனத்தின்  இந்திய  கிளை முதல்வரை  சேடுவது நமது பாரம்பரியம் தானா? 

2) சமுக வலையில் வரும்  செய்திகள் எல்லாம் 100 /100 உண்மை என நம்பி நாமும் பகிர்கின்றோம். உங்கள் ஊர்களில் நடுவில் கூரை ஒன்று அமைத்து ஒலி பெருக்கிகளில்  செய்திகளை பரப்பி , அவற்றில் பெரு வாரியான செய்திகள் போலி என்றாயினால் ஊர் சும்மா விடுமா? பின்னர் சமுக ஊடகங்களில் மட்டும் எல்லா செய்திகளையும் எப்படி பகிர்கிறீர்கள்? ஜல்லிக்கட்டு நமது பசுக்களை அழியாமல் காப்பாற்றுவதாக ஒரு செய்தி.. பாலில் A1,A2  வகை இருப்பதாக இன்னொரு செய்தி. இவை எந்த அளவிற்கு உண்மை? சமுக வலை என்பது நமது ஊர் டீக்கடை பெஞ்சு/ ஆலமரத்தடி என்று உணர்க! பொறுப்பற்ற , நேரத்தை வீணடிக்கும் செய்திகளை எவ்வாறு நிகழ்வாழ்வில் தவிர்ப்பீர்களோ அது போல சமுக ஊடகங்களிலும் தூர விலகுக..

3)  "ஏனுங்க, வந்திடுங்க" என்று வார்த்தைக்கு வார்த்தை "ங்க" போட்டு பேசும் கோயம்புத்தூர் தமிழ் முதல் "ஏலேய்" "வால" எனும் தெற்கத்திய தமிழ் வரை, வார்த்தைகள் மாறினாலும் பிற மனிதர்களுக்கு மரியாதை அளிப்பது நமது கலாச்சாரத்தின் தனித்தன்மைகளில் ஒன்று. ஆயினும் சமுக ஊடகங்களில் மாறுபாடான கருத்தை கண்டால் கலவரமாகி தெரு குழாய் சண்டை நடக்கிறது. நேரில் காணும் போது இங்கிதம் , நாகரிகமாக

நடக்கும் அன்பர்கள் , வலையில்(web) முற்றிலும் வேறுபட்ட அவதாரமாக காட்சியளிப்பது எப்படி?

4) ஜல்லிக்கட்டு உணர்வு பூர்வமான விஷயம். அனைவரும் கொதித்தெழுவது இயல்பு. எனினும் இதே போல பல விஷயங்கள் , அநீதிகள் தமிழ்நாட்டில் உள்ளன. சென்ற வருடம்,சாதி மாறி திருமணம் செய்த ஒரு ஜோடி cam முன்னர்  வெட்டி சாய்க்கப்பட்டனர் . அப்பொழுது சாதி எனும் இழிவை தடை செய்ய எந்த தமிழனும் முன்வரவில்லையே? தமிழ்நாட்டின் 10 பல்கலைகழகங்களில் முதல்வர் பதவியிலிருந்து , ஆசிரியர் பதவி நியமனம் வரை ஆளும் கட்சி தீர்மானிக்கிறது. அதனை தடுக்க எந்த மாணவனும் தயாரா?
 நமக்கு வசதிப்படும் விஷயங்களுக்கு மட்டும் தான் போராட்டமா?

5) "I may not agree with what you say. but I will defend to death your right to say it" 

என்பது ஆங்கில எழுத்தாளர் Evelyn Beatrice Hall இன் பிரபலமான வாக்கியம். ஜனநாயகத்தின் மிக மிக அடிப்படையான தனி நபர் சுதந்திரத்தை பிரதிபலிக்கும் வாக்குமூலம் இது. நமக்கு மாற்றான கொள்கை கொண்டவர்களுக்கு மரண தண்டனை அளிக்க வேண்டுமென்றால் அது ஜனநாயகமன்று. அது ஆதிக்கவர்க்கத்தின் இன்னோரு முகம். நாம் அடைந்த சுதந்திரம் இன்னொரு குழு ஆதிக்கம் செலுத்த வகை செய்யும் ஆயுதமில்லை. இக் கொள்கையில் நமக்கு உடன்பாடு இல்லை என்றால் நாம் உண்மையில் சுதந்திரத்தை மதிக்கின்றோமா?